[ریکارڈز] ون ڈے کرکٹ میں سب سے زیادہ رنز کھانے والے باؤلر، شاہد آفریدی سرفہرست

پاکستان کے لیے مایوس کن ایک روزہ سیریز کا اختتام چار-ایک سے جنوبی افریقہ کے حق میں ہوا اور گو کہ ٹیم نے ابھی دو ٹی ٹوئنٹی مقابلے کھیلنے ہیں لیکن یہ دورہ اجتماعی و انفرادی طور دونوں سطحوں پر ناکامیوں سے عبارت رہاہے۔ پاکستان کے جن کھلاڑیوں سے شائقین کو بہت توقعات ہوتی ہیں وہ بھی پروٹیز کے خلاف پے در پے ناکامی کا شکار رہے جن میں سب سے نمایاں آل راؤنڈر شاہد آفریدی رہے۔

پوری سیریز میں پاکستان ایک ہی مقابلہ جیتا جس میں وہ مرد میدان بنے لیکن اس کے علاوہ چار مقابلوں میں ان سمیت تمام کھلاڑی بجھے بجھے دکھائی دیے۔ دو جیتی ہوئی بازیاں پاکستان نے اپنے ہاتھوں سے گنوائیں اور سیریز طشتری میں رکھ کر جنوبی افریقہ کو پیش کردی۔

سیریز کے پانچویں و آخری ون ڈے میں شاہد آفریدی نے ایک روزہ کرکٹ میں سب سے زیادہ رنز کھانے والے باؤلر کا ریکارڈ اپنے نام کیا۔ انہوں نے سری لنکا کے عظیم اسپنر متیاہ مرلی دھرن کا 12 ہزار 326 رنز بنانے کا ریکارڈ توڑا اور یوں 12 ہزار 363 رنز دے کر ایک روزہ کرکٹ میں سب سے زیادہ کھانے والے باؤلر بن گئے۔

شاہد سے قبل پاکستان کی جانب سے سب سے زیادہ رنز جس باؤلر کو پڑے وہ عظیم وسیم اکرم تھے جنہوں نے 356 مقابلوں میں 11 ہزار 812 رنز کھائے جبکہ وقار یونس کو 9 ہزار 919 رنز پڑے۔

گو کہ اس فہرست میں دنیا کے چند مایہ ناز باؤلرز موجود ہیں، جن کے پاس کئی ریکارڈز ہیں لیکن ان میں شاہد آفریدی کا اوسط سری لنکا کے سنتھ جے سوریا کے بعد سب سے زیادہ ہے۔

ایک روزہ کیریئر میں سب سے زیادہ رنز کھانے والے باؤلر

گیندباز	ملک	دورانیہ	مقابلے	گیندیں	رنز	وکٹیں	بہترین باؤلنگ	اوسط	اکانمی ریٹ
شاہد آفریدی	پاکستان	1996ء تا 2013ء	367	16078	12363	367	7/12	33.68	4.61
متیاہ مرلی دھرلی	سری لنکا	1993ء تا 2011ء	350	18811	12326	534	7/30	23.08	3.93
سنتھ جے سوریا	سری لنکا	1989ء تا 2011ء	445	14874	11871	323	6/29	36.75	4.78
وسیم اکرم	پاکستان	1984ء تا 2003ء	356	18186	11812	502	5/15	23.52	3.89
چمندا واس	سری لنکا	1994ء تا 2008ء	322	15775	11014	400	8/19	27.53	4.18
انیل کمبلے	بھارت	1990ء تا 2007ء	271	14496	10412	337	6/12	30.89	4.30
وقار یونس	پاکستان	1989ء تا 2003ء	262	12698	9919	416	7/36	23.84	4.68
شان پولاک	جنوبی افریقہ	1996ء تا 2008ء	303	15712	9631	393	6/35	24.50	3.67
ڈینیل ویٹوری	نیوزی لینڈ	1997ء تا 2013ء	275	13029	8946	284	5/7	31.50	4.11
بریٹ لی	آسٹریلیا	2000ء تا 2012ء	221	11185	8877	380	5/22	23.86	4.76

اگر ٹیسٹ، ایک روزہ اور ٹی ٹوئنٹی مقابلوں کا مشترکہ ریکارڈ دیکھا جائے تو سب سے زیادہ رنز کھانے کا ریکارڈ سری لنکا کے متیاہ مرلی دھرن ہی کے پاس ہے لیکن ساتھ ساتھ ان کے پاس سب سے زیادہ وکٹیں بھی ہیں اور اس معاملے میں کوئی کھلاڑی ان کے قریب قریب بھی نہیں۔ مرلی دھرن نے 495 بین الاقوامی مقابلوں میں 63 ہزار 132 گیندیں پھینکیں اور 30 ہزار 803 رنز کھائے۔ اس کے باوجود ان کا اوسط صرف 22.86 رہا جبکہ انہوں نے ریکارڈ 1347 وکٹیں حاصل کیں جن میں 77 مرتبہ پانچ اور 22 مرتبہ 10 وکٹیں لینے کا کارنامہ بھی شامل ہے جو خود بھی الگ، الگ ریکارڈز ہیں۔

اگر مجموعی طور پر دیکھا جائے تو پاکستان کی جانب سے سب سے زیادہ رنز کھانے والے وسیم اکرم ہیں جنہوں نے 460 بین الاقوامی میچز میں 21 ہزار 591 رنز کھائے البتہ ان کا اوسط صرف 23.57 ہے اور وکٹیں بھی 916 ہیں۔ شاہد آفریدی نے کیونکہ ٹیسٹ میچز بہت کم کھیلے ہیں اس لیے اس فہرست میں ان کا نام کافی پیچھے ہے۔ انہوں نے 15 ہزار 545 رنز کھائے جبکہ جن میں 12 ہزار سے زیادہ رنز تو انہیں ون ڈے کرکٹ ہی میں پڑ چکےہیں۔

بین الاقوامی کرکٹ میں سب سے زیادہ رنز کھانے والے باؤلرز

گیندباز	ملک	دورانیہ	مقابلے	گیندیں	رنز	وکٹیں	بہترین باؤلنگ فی اننگز	اوسط	اکانمی ریٹ
متیاہ مرلی دھرلی	سری لنکا	1992ء تا 2011ء	495	63132	30803	1347	9/51	22.86	2.92
انیل کمبلے	بھارت	1990ء تا 2008ء	403	55346	28767	956	10/74	30.9	3.11
شین وارن	آسٹریلیا	1992ء تا 2007ء	339	51347	25536	1001	8/71	25.51	2.98
ہربھجن سنگھ	بھارت	1998ء تا 2013ء	355	40892	22596	694	8/84	32.55	3.31
ڈینیل ویٹوری	نیوزی لینڈ	1997ء تا 2013ء	420	42468	22058	681	7/87	32.39	3.11
چمندا واس	سری لنکا	1994ء تا 2009ء	439	39345	21643	761	8/19	28.44	3.30
وسیم اکرم	پاکستان	1984ء تا 2003ء	460	40813	21591	916	7/119	23.57	3.17
گلین میک گرا	آسٹریلیا	1993ء تا 2007ء	376	42266	20656	949	8/24	21.76	2.93
کپل دیو	بھارت	1978ء تا 1994ء	356	38942	19812	687	9/83	28.83	3.05
شان پولاک	جنوبی افریقہ	1995ء تا 2008ء	423	40308	19673	829	7/87	23.73	2.92