[ریکارڈز] دونوں اننگز میں سنچریاں بنانے والے پاکستانی

پاکستان کے اوپنر امام الحق نے آسٹریلیا کے خلاف راولپنڈی ٹیسٹ کی دونوں اننگز میں سنچریاں بنا کر تاریخ میں اپنا نام محفوظ کروا لیا ہے۔ وہ پاکستانی کرکٹ تاریخ کے دسویں بلے باز بنے ہیں، جنہوں نے کسی ٹیسٹ کی دونوں اننگز میں سنچریاں بنائی ہوں۔

دلچسپ بات یہ ہے کہ اس ٹیسٹ سے قبل امام کے ریکارڈ پر ایک ٹیسٹ سنچری بھی نہیں تھی لیکن بلے بازی کے لیے انتہائی سازگار وکٹ "شاہراہِ پنڈی" پر انہوں نے قسمت کے بل بوتے پر دونوں اننگز میں تہرے ہندسے میں پہنچے۔ دونوں اننگز میں وہ سنچری تک پہنچنے سے پہلے آؤٹ ہو گئے تھے لیکن آسٹریلیا کے ریویو نہ لینے کی وجہ سے بچ گئے۔

بہرحال، پاکستان کے لیے سب سے پہلے یہ کارنامہ عظیم بلے باز اور اصل 'لٹل ماسٹر' حنیف محمد نے انجام دیا تھا۔ 1962ء میں انگلینڈ کے خلاف ڈھاکا ٹیسٹ میں حنیف نے پہلی اننگز میں 111 اور دوسری میں 104 رنز بنائے تھے۔

‏1984ء میں جاوید میانداد اس فہرست میں اگلا اضافہ بنے اور وقت کے ساتھ ساتھ وجاہت اللہ واسطی، یاسر حمید، انضمام الحق اور محمد یوسف کے بعد یونس خان، اظہر علی اور مصباح الحق بھی اس میں شامل ہو گئے۔ آخری تینوں بلے بازوں نے تو ایک ہی سیریز میں ایسا کر دکھایا تھا۔ یہ 2014ء میں آسٹریلیا کے خلاف متحدہ عرب امارات میں کھیلی گئی سیریز تھی۔ مصباح نے تو اُس وقت کی تیز ترین ٹیسٹ سنچری کا ریکارڈ قائم کرتے ہوئے دونوں اننگز میں سنچریاں کی تھیں۔ یہ ایک بڑا یادگار ٹیسٹ میچ تھا۔

یاسر حمید کو یہ انفرادیت حاصل ہے کہ انہوں نے اپنے پہلے ہی ٹیسٹ کی دونوں اننگز میں سنچریاں داغ دی تھی۔ بنگلہ دیش کے خلاف 2003ء کے کراچی ٹیسٹ میں انہوں نے 170 اور 105 رنز کی اننگز کھیلی تھیں۔ وہ ویسٹ انڈیز کے لارنس رو کے بعد ایسا کر دکھانے والے دوسرے بلے باز تھے۔

کسی ٹیسٹ کی دونوں اننگز میں سنچریاں بنانے والے پاکستانی بلے باز

بلے باز	پہلی اننگز	دوسری اننگز	بمقابلہ	بمقام	بتاریخ
حنیف محمد	111	104	انگلینڈ	ڈھاکا	جنوری 1962ء
جاوید میانداد	104	103*	نیوزی لینڈ	حیدر آباد	نومبر 1984ء
وجاہت اللہ واسطی	133	121*	سری لنکا	لاہور	مارچ 1999ء
یاسر حمید	170	105	بنگلہ دیش	کراچی	اگست 2003ء
انضمام الحق	109	100*	انگلینڈ	فیصل آباد	نومبر 2005ء
محمد یوسف	102	124	ویسٹ انڈیز	کراچی	نومبر 2006ء
یونس خان	106	103*	آسٹریلیا	دبئی	اکتوبر 2014ء
اظہر علی	109	100*	آسٹریلیا	ابو ظبی	اکتوبر 2014ء
مصباح الحق	101	101*	آسٹریلیا	ابو ظبی	اکتوبر 2014ء
امام الحق	157	105*	آسٹریلیا	راولپنڈی	مارچ 2022ء

ویسے کرکٹ تاریخ میں یہ کارنامہ انجام دینے والے بلے بازوں کی تعداد کم نہیں ہے۔ امام الحق سے پہلے 1909ء سے لے کر 2022ء تک 87 بلے باز ایسا کر چکے ہیں۔ امام سے پہلے آخری بلے آسٹریلیا کے عثمان خواجہ تھے کہ جنہوں نے رواں سال کے آغاز پر انگلینڈ کے خلاف ایشیز ٹیسٹ 137 اور 101 رنز کی اننگز کھیلی تھیں۔