بھارت کے سب سے بڑے اور مشہور میدان ایڈن گارڈنز میں تعمیراتی کام کی سست روی کے باعث بین الاقوامی کرکٹ کونسل نے اسے اہم میچ کی میزبانی سے محروم کر دیا تھا۔ اب یہ میچ مقررہ تاریخ یعنی 27 فروری ہی کو بنگلور میں کھیلا جائے گا۔
آئی سی سی نے ایڈن گارڈنز کو سونپے گئے مزید تین میچز کے حوالے سے تاحال کوئی فیصلہ نہیں کیا لیکن ایک خط میں بھارتی کرکٹ بورڈ (بی سی سی آئی) سے کہا ہے کہ وہ عالمی کپ کے لیے ایڈن گارڈنز کے تعمیراتی کام کی بروقت تکمیل کو ممکن بنائے۔ اس سلسلے میں آئی سی سی کی ٹیم 7 فروری کو ایڈن گارڈنز کا دورہ کرے گی۔
ایڈن گارڈنز کو بھارت اور انگلستان کے اہم میچ کے علاوہ مزید تین مقابلوں کی میزبانی سونپی گئی تھی۔ جن میں صرف مذکورہ میچ ہی میں بھارت کو کھیلنا تھا تاہم اب کولکتہ تین غیر اہم میچز کی میزبانی کرے گا جن میں آئرلینڈ اور جنوبی افریقہ، آئرلینڈ اور نیدرلینڈز اور کینیا اور زمبابوے مدمقابل ہوں گے۔ دوسری جانب چناسوامی کو اب 5 میچز کی میزبانی ملے گی۔ جن میں سے دو میں بھارت کھیلےگا یعنی ایک مذکورہ بھارت- انگلستان مقابلہ اور دوسرا بھارت اور آئرلینڈ کا میچ۔ ان کے علاوہ دیگر میچز میں انگلستان و آئرلینڈ، آسٹریلیا و کینیا اور آسٹریلیا و کینیڈا مدمقابل ہوں گے۔
