ایلسٹر کک کن عظیم بلے بازوں کی فہرست میں شامل نہ ہو سکے - خصوصی تحریر

انگلستان کے ایلسٹر کک کی بدقسمتی دیکھیے کہ وہ 21 سال بعد ٹرپل سنچری اسکور کرنے والے پہلے انگلش بلے باز بننے جا رہے تھے لیکن 'ٹوٹی کہاں کمند' کہ وہ 294 رنز ہی بنا پائے اور انتہائی ناقص شاٹ کھیل کر ہاتھوں سے وکٹ گنوا بیٹھے۔ یوں وہ ان بدقسمت کھلاڑیوں میں شامل ہو گئے جو اس اعلیٰ ترین اعزاز کے اتنا قریب پہنچ کر بھی حاصل نہ کر سکے۔ 1991ء میں نیوزی لینڈ کے مارٹن کرو کا 299 پر آؤٹ ہونا کسے یاد نہ ہوگا؟ شاید کک بھی اسی طرح یاد رکھے جائیں۔

بہرحال، ٹیسٹ کرکٹ میں ٹرپل سنچری اسکور کرنا دنیا کے ہر عظیم بلے باز کا خواب ہوتا ہے اور یہی وجہ ہے کہ سینکڑوں کھلاڑیوں میں سے اب تک صرف 20 بلے باز ایسے ہیں جنہیں یہ اعزاز حاصل ہوا ہے۔

کرکٹ اپنی تاریخ کے ابتدائی 50 سالوں تک کسی بھی ٹرپل سنچری سے محروم رہی اور بالآخر یہ اعزاز سب سے پہلے انگلستان کے اینڈی سینڈہیم کو ملا جنہوں نے 1930ء کے دورۂ ویسٹ انڈیز میں سبائنا پارک، کنگسٹن، جمیکا میں 325 رنز کی یادگار اننگز کھیلی۔ اس کے بعد تو گویا سلسلہ چل پڑا۔ کرکٹ کی تاریخ کے عظیم ترین بلے باز سر ڈان بریڈمین نے دو ماہ بعد ہیڈنگلے، لیڈز میں 334 رنز کی اننگز کھیلی۔ بریڈمین ان چار کھلاڑیوں میں سے ایک ہیں جنہوں نے دو مرتبہ ٹرپل سنچری اسکور کی۔ ان کے علاوہ یہ اعزاز ویسٹ انڈیز کے برائن لارا اور کرس گیل اور بھارت کے وریندر سہواگ کو حاصل ہے۔ برائن لارا سب سے زیادہ یعنی 400٭ رنز کی انفرادی اننگز کھیل چکے ہیں یوں وہ واحد بلے باز ہیں جنہیں 400 رنز بنانے کا اعزاز حاصل ہے۔

پاکستان کی جانب سے تین بلے بازوں کو ٹرپل سنچری اسکور کرنے کا اعزاز حاصل ہے جن میں بلاشبہ مارچ 1958ء میں ویسٹ انڈیز کے خلاف کینسنگٹن اوول، برج ٹاؤن، بارباڈوس میں اسکور کی گئی حنیف محمد کی ٹرپل سنچری سب سے نمایاں ہے۔ حنیف محمد کی یہ اننگز کرکٹ کی تاریخ کی واحد ٹرپل سنچری ہے جو ٹیم کی دوسری اننگز میں اسکور کی گئی۔ اس کے علاوہ تمام 23 مواقع پر بلے بازوں نے پہلی اننگز میں ٹرپل سنچری بنائی۔

حنیف محمد کی یہ اننگز کئی حوالے سے یادگار تھی۔ ایک تو پاکستان ویسٹ انڈیز کے 579 رنز کے جواب میں محض 106 رنز بنا کر آؤٹ ہو گیا اور فالو آن کا شکار ہوا اور حنیف نے یہ میچ بچاؤ اننگز کھیلی، دوسرا پاکستان کے دیگر دونوں بلے بازوں نے اپنے ملک کے میدانوں میں یہ ٹرپل سنچریاں بنائیں جبکہ حنیف محمد نے ویسٹ انڈیز جیسی خطرناک ٹیم کے خلاف اسی کے میدان پر یہ کارنامہ انجام دیا۔ تیسرا حنیف محمد کی یہ اننگز 970 منٹ طویل تھی جو آج 53 سال گزر جانے کے باوجود ایک ریکارڈ ہے۔ اس کے علاوہ یہ آج تک پاکستان کے کسی بھی بلے باز کی رنز کے لحاظ سے بھی طویل ترین ٹیسٹ اننگز ہے اور ان کے بعد دو کھلاڑی اس ریکارڈ کے قریب آ کر بھی اسے نہ توڑ سکے۔

پاکستان کے انضمام الحق نے مئی 2002ء میں نیوزی لینڈ کے خلاف لاہور کے قذافی اسٹیڈیم میں 329 رنز کی فتح کر اننگز کھیلی۔ وہ حنیف محمد کے ریکارڈ سے محض 8 رنز کے فاصلے پر تھے کہ آؤٹ ہو گئے۔ ان کے بعد پاکستان کی تیسری ٹرپل سنچری یونس خان نے اسکور کی جنہوں نے فروری 2009ء میں سری لنکا کے خلاف کراچی کے نیشنل اسٹیڈیم میں 313 رنز بنائے۔

بھارت کی جانب سے صرف ایک بلے باز کو ٹرپل سنچری اسکور کرنے کا اعزاز حاصل ہے اور وہ بھی دو مرتبہ۔ یہ نام ہے شعلہ فشاں بلے باز وریندر سہواگ کا جنہوں نے اپنے زمانے کی دو مضبوط ترین ٹیموں کے خلاف یادگار اننگز کھیلیں۔ سہواگ نے اپریل 2004ء میں پاکستان کے خلاف ملتان کرکٹ اسٹیڈیم میں 309 رنز بنائے اور مارچ 2008ء میں چنئی میں جنوبی افریقہ کے خلاف 319 رنز کی اننگز کھیلی۔

کرکٹ تاریخ کی ٹرپل سنچریوں کی مکمل فہرست درج ذیل ہے:

شمار	رنز	بلے باز	ملک	بمقابل	مقام	تاریخ
1	325	اینڈی سینڈہیم			سبائنا پارک، کنگسٹن	3 اپریل 1930ء
2	334	ڈونلڈ بریڈمین			ہیڈنگلے، لیڈز	11 جولائی 1930ء
3	336٭	والی ہیمنڈ			ایڈن پارک، آکلینڈ	31 مارچ 1933ء
4	304	ڈونلڈ بریڈمین			ہیڈنگلے، لیڈز	20 جولائی 1934ء
5	364	لین ہٹن			اوول، لندن	20 اگست 1938ء
6	337	حنیف محمد			کینسنگٹن اوول، برج ٹاؤن	17 جنوری 1958ء
7	365٭	گارفیلڈ سوبرز			سبائنا پارک، کنگسٹن	26 فروری 1958ء
8	311	باب سمپسن			اولڈ ٹریفرڈ، مانچسٹر	23 جولائی 1964ء
9	310٭	جان ایڈرچ			ہیڈنگلے، لیڈز	8 جولائی 1965ء
10	307	باب کاؤپر			ملبورن کرکٹ گراؤنڈ	11 فروری 1966ء
11	302	لارنس رو			کینسنگٹن اوول، برج ٹاؤن	6 مارچ 1974ء
12	333	گراہم گوچ			لارڈز کرکٹ گراؤنڈ، لندن	26 جولائی 1990ء
13	375	برائن لارا			اینٹیگا ری کری ایشن گراؤنڈ، سینٹ جانز	16 اپریل 1994ء
14	340	سنتھ جے سوریا			پریماداسا اسٹیڈیم، کولمبو	2 اگست 1997ء
15	334٭	مارک ٹیلر			ارباب نیاز اسٹیڈیم، پشاور	15 اکتوبر 1998ء
16	329	انضمام الحق			قذافی اسٹیڈیم، لاہور	یکم مئی 2002ء
17	380	میتھیو ہیڈن			واکا گراؤنڈ، پرتھ	9 اکتوبر 2003ء
18	309	وریندر سہواگ			ملتان کرکٹ اسٹیڈیم	28 اپریل 2004ء
19	400٭	برائن لارا			اینٹیگا ری کری ایشن گراؤنڈ، سینٹ جانز	10 اپریل 2004ء
20	317	کرس گیل			اینٹیگا ری کری ایشن گراؤنڈ، سینٹ جانز	29 اپریل 2005ء
21	374	مہیلا جے وردھنے			سنہالیز اسپورٹس کلب، کولمبو	27 جولائی 2006ء
22	313	وریندر سہواگ			چدمبرم اسٹیڈیم، چنئی	26 مارچ 2008ء
23	313	یونس خان			نیشنل اسٹیڈیم، کراچی	21 فروری 2009ء
24	333	کرس گیل			گال انٹرنیشنل اسٹیڈیم	15 نومبر 2010ء