بھارت، ایک سال میں آٹھواں کپتان

بھارت نے گزشتہ سال انگلینڈ کا دورہ کیا تھا۔ ابتدائی چار ٹیسٹ میں ‏2-1 کی برتری کے ساتھ ناقابلِ شکست مقام بھی حاصل کر لیا لیکن کووڈ-19 پھوٹ پڑا اور آخری و فیصلہ کن ٹیسٹ ملتوی ہو گیا۔

تقریباً 10 ماہ بعد اب پٹودی ٹرافی کا آخری ٹیسٹ ایجبسٹن، برمنگھم میں شروع ہو چکا ہے۔ لیکن اس دوران پُلوں کے نیچے سے بہت سا پانی بہہ چکا ہے۔ انگلینڈ کا تو حال حلیہ ہی بدل چکا ہے۔ نیا کوچ، نیا کپتان، نئے کھلاڑی بلکہ رنگ روپ ہی الگ ہے۔ کہاں 20 میں سے 14 میچز ہارنے والی ٹیم اور کہاں ورلڈ ٹیسٹ چیمپیئن نیوزی لینڈ کو کلین سوئپ کرنے والا یہ اسکواڈ۔ جبکہ بھارت کا حال یہ ہے کہ انٹرنیشنل کرکٹ میں ایک سال میں آٹھواں کپتان آزما رہا ہے۔

روہت شرما کے کووِڈ-19 کے شکار ہونے کی وجہ سے ایجبسٹن میں بھارت کی قیادت جسپریت بمراہ کر رہے ہیں۔ یوں وہ گزشتہ ایک سال میں بھارت کے آٹھویں کپتان بن چکے ہیں۔ پچھلے سال جولائی سے اب تک بھارت انٹرنیشنل کرکٹ میں شیکھر دھاون، ویراٹ کوہلی، روہت شرما، اجنکیا رہانے، کے ایل راہُل، رشبھ پنت، ہاردِک پانڈیا اور اب بمراہ سے کپتانی کروا چکا ہے۔

وجوہات جو بھی ہوں، بس اتنی جلدی کپتان بدلنے سے پرانے پاکستان کی یادیں تازہ ہو گئی ہیں۔

خیر، یہ بمراہ کا انٹرنیشنل کرکٹ میں بحیثیتِ کپتان پہلا میچ ہے۔ یہ 35 سال بعد پہلا موقع ہوگا کہ کوئی فاسٹ باؤلر بھارت کی قیادت کرے گا۔ آخری بار 1987ء میں کپل دیو نے کسی ٹیسٹ میں کپتانی کے فرائض انجام دیے تھے۔

انگلینڈ کے لیے یہ ٹیسٹ جیتنا بہت ضروری ہے۔ وہ نیوزی لینڈ کے خلاف کامیابی سے حوصلہ پاتے ہوئے ایسا کرنے کی کوشش ضرور کرے گا، لیکن سامنے بھارت ہے، اس لیے مشکل تو ہے لیکن مقابلہ دلچسپ ہوگا۔

بھارت کا دورۂ انگلینڈ ‏2021-22ء

	نتیجہ	مارجن	بمقابلہ	بمقام	بتاریخ
پہلا ٹیسٹ	بے نتیجہ	-	انگلینڈ	ناٹنگھم	‏4 تا 8 اگست 2021ء
دوسرا ٹیسٹ	جیت	151 رنز	انگلینڈ	لارڈز	‏12 تا 16 اگست 2021ء
تیسرا ٹیسٹ	شکست	اننگز اور 76 رنز	انگلینڈ	لیڈز	‏25 تا 28 اگست 2021ء
چوتھا ٹیسٹ	جیت	157 رنز	انگلینڈ	اوول	‏2 تا 6 ستمبر 2021ء