[ریکارڈز] ایلکس ہیلز کی اننگز اور تیز ترین ٹی ٹوئنٹی سنچری

تین سال سے زیادہ کا عرصہ گزر چکا ہے، ہمیں انٹرنیشنل کرکٹ میں ایلکس ہیلز کی جھلک تک دیکھنے کو نہیں ملی۔ لیکن آج بھی ہیلز کی بیٹنگ دیکھنے کے قابل ہے۔ یقین نہیں آتا تو گزشتہ شب کھیلی گئی یہ اننگز دیکھ لیں:

ALEX HALES YOU MAGICIAN 😱

9️⃣1️⃣ runs
3️⃣3️⃣ balls
1️⃣7️⃣ boundaries #Blast22 pic.twitter.com/iaHpcityDj

— Vitality Blast (@VitalityBlast) June 3, 2022

ڈربی شائر کے خلاف، جی ہاں! شان مسعود کی ڈربی شائر کے خلاف، ہیلز نے وہ طوفانی اننگز کھیلی کہ ماضی کی یادیں تازہ ہو گئیں۔ بلکہ یہ کہیں تو زیادہ بہتر ہوگا کہ پاکستانیوں کے پرانے زخم تازہ ہو گئے۔

وائٹیلٹی بلاسٹ کے ایک مقابلے میں ڈربی شائر فیلکنز نے پہلے کھیلتے ہوئے 179 رنز کا ہدف دیا۔ ناٹنگھم شائر آؤٹ لاز نے اس کا تعاقب شروع کیا اور کیا ہی تباہ کن انداز میں کیا۔ صرف 51 گیندوں پر 119 رنز کی اوپننگ پارٹنرشپ بنا ڈالی، جس میں نمایاں حصہ تھا ایلکس ہیلز کا۔

جب ہیلز آؤٹ ہوئے تو صرف 9 اوورز میں ہی اسکور 125 رنز کو چھو رہا تھا۔ اس میں ہیلز کا حصہ سب سے نمایاں تھا۔ انہوں نے صرف 33 گیندوں پر پانچ چھکوں اور 12 چوکوں کی مدد سے 91 رنز بنائے۔ بد قسمتی سے سنچری مکمل نہیں کر سکے اور اگر کر لیتے تو تاریخ کی نمایاں ترین ٹی ٹوئنٹی اننگز میں سے ایک ہوتی۔

تیز ترین ٹی ٹوئنٹی سنچری کا ریکارڈ

ٹی ٹوئنٹی میں تیز ترین سنچری کا ریکارڈ ویسٹ انڈیز کے، بلکہ رائل چیلنجز بنگلورز کے کرس گیل کے پاس ہے۔  2013ء میں پونے واریئرز کے خلاف ایک مقابلے میں انہوں نے صرف 30 گیندوں پر سنچری بنائی تھی۔

اس کے بعد رشتھ پنت کا نام آتا ہے، جنہوں نے 2018ء میں سید مشتاق علی ٹرافی کے ایک مقابلے میں دلّی کی طرف سے کھیلتے ہوئے صرف 32 گیندوں پر سنچری بنائی تھی۔ ہماچل پردیش کے خلاف اس مقابلے میں دلّی 145 رنز کا تعاقب کر رہا تھا، اور یہ ہدف اس نے محض 12 ویں اوور میں حاصل کر لیا۔ پنت 38 گیندوں پر 116 رنز کے ساتھ ناقابلِ شکست میدان سے واپس آئے۔

لیکن ان سب سے بڑی اور شاہکار اننگز وہ تھی، جو 2004ء میں اینڈریو سائمنڈز نے کھیلی۔ حال ہی میں ایک حادثے میں جان دینے والے سائمنڈز نے ٹی ٹوئنٹی کپ کے ایک مقابلے میں مڈل کینٹ کی جانب سے صرف 34 گیندوں پر سنچری اسکور کی تھی۔ انہوں نے صرف 43 گیندوں پر 112 رنز کی کیپٹن اننگز کھیلی، وہ بھی اُس زمانے میں جب ٹی ٹوئنٹی انٹرنیشنل کرکٹ ابھی ایجاد بھی نہیں ہوئی تھی۔

تیز ترین ٹی ٹوئنٹی سنچریاں

بلے باز	گیندیں	ٹیم	بمقابلہ	بمقام	بتاریخ
کرس گیل	30	رائل چیلنجز بنگلور	پونے واریئرز	بنگلور	‏23 اپریل 2013ء
رشبھ پنت	32	دلّی	ہماچل پردیش	دلّی	‏14 جنوری 2018ء
ویہان لب	33	نارتھ ویسٹ	لمپوپو	پارل	‏15 ستمبر 2018ء
اینڈریو سائمنڈز	34	کینٹ	مڈل سیکس	میڈسٹون	‏2 جولائی 2004ء
لوئس وان ڈیر ویسٹوئزن	35	نمیبیا	کینیا	ونڈہوئک	‏7 نومبر 2011ء
ڈیوڈ ملر	35	جنوبی افریقہ	بنگلہ دیش	پوچفیسٹروم	‏29 اکتوبر 2017ء
روہت شرما	35	بھارت	سری لنکا	اندور	‏22 دسمبر 2017ء
مارٹن گپٹل	35	وارسسٹرشائر	نارتھمپٹن شائر	نارتھمپٹن	‏27 جولائی 2018ء
خوشدل شاہ	35	جنوبی پنجاب	سندھ	راولپنڈی	‏9 اکتوبر 2020ء
یوسف پٹھان	37	راجستھان رائلز	ممبئی انڈینز	ممبئی	‏13 مارچ 2010ء

ٹی ٹوئنٹی انٹرنیشنل اور تیز ترین سنچری

اگر ٹی ٹوئنٹی انٹرنیشنل میں دیکھا جائے تو یہاں تیز ترین سنچری کا ریکارڈ جنوبی افریقہ کے ڈیوڈ ملر اور بھارت کے روہت شرما کے پاس ہے۔ دونوں نے ایک ہی سال 2017ء میں 35، 35 گیندوں پر سنچریاں بنائی تھیں۔ ملر نے اکتوبر 2017ء میں بنگلہ دیش کے خلاف 36 گیندوں پر 101 رنز کی ناٹ آؤٹ اننگز کھیلی تھی۔

دو مہینے سے بھی کم عرصے میں یہ ریکارڈ بھارت کے روہت شرما نے برابر کر دیا۔ یہ سری لنکا کے خلاف اندور میں کھیلا گیا ایک ٹی ٹوئنٹی انٹرنیشنل تھا جس میں روہت نے 43 گیندوں پر 118 رنز کی اننگز کھیلی تھی۔ اس دوران انہوں نے 35 گیندوں پر سنچری مکمل کر کے ملر کا عالمی ریکارڈ برابر کیا تھا۔

ٹی ٹوئنٹی انٹرنیشنل میں تیز ترین سنچریاں

بلے باز	گیندیں	ٹیم	بمقابلہ	بمقام	بتاریخ
ڈیوڈ ملر	35	جنوبی افریقہ	بنگلہ دیش	پوچفیسٹروم	‏29 اکتوبر 2017ء
روہت شرما	35	بھارت	سری لنکا	اندور	‏22 دسمبر 2017ء
سدیش وکرماسیکرا	35	چیک جمہوریہ	ترکی	الفوو کاؤنٹی	‏30 اگست 2019ء
شیوکمار پریالوار	39	رومانیہ	ترکی	الفیو کاؤنٹی	‏29 اگست 2019ء
جارج منسی	41	اسکاٹ لینڈ	نیدرلینڈز	ڈبلن	‏16 ستمبر 2019ء
شہریار بٹ	41	بیلجیئم	چیک جمہوریہ	والفرڈینگ	‏29 اگست 2020ء
حضرت اللہ زازئی	42	افغانستان	آئرلینڈ	دہرہ دون	‏23 فروری 2019ء
لیام لوِنگسٹن	42	انگلینڈ	پاکستان	ناٹنگھم	‏17 جولائی 2021ء
ژاں-پیئر کوٹزے	43	نمیبیا	بوٹسوانا	ونڈہوئک	‏20 اگست 2019ء
رچرڈ لیوی	45	جنوبی افریقہ	نیوزی لینڈ	ہیملٹن	‏19 فروری 2020ء

پاکستان کے لیے تیز ترین ٹی ٹوئنٹی سنچری کا ریکارڈ بابر اعظم کے پاس ہے۔ انہوں نے اپریل 2021ء میں سنچورین کے مقام پر جنوبی افریقہ کے خلاف 49 گیندوں پر ٹی ٹوئنٹی سنچری بنائي تھی۔ وہ 59 گیندوں پر 122 رنز بنانے کے بعد آؤٹ ہوئے تھے جبکہ پاکستان نے 204 رنز کا بڑا ہدف، محض ایک وکٹ کے نقصان پر پورا کر لیا۔