آسٹریلیا کے خلاف واحد ٹی ٹوئنٹی میں شاہین آفریدی کی باؤلنگ پاکستان کو جتوا تو نہیں پائی، لیکن خود شاہین کو عالمی رینکنگ میں ٹاپ 10 میں ضرور لے آئی ہے۔ یوں وہ بیک وقت تینوں طرز کی بین الاقوامی کرکٹ میں دنیا کے 10 بہترین باؤلرز میں شامل ہو گئے ہیں۔
انٹرنیشنل کرکٹ کونسل کی تازہ ترین درجہ بندی کے مطابق آسٹریلیا کے خلاف 21 رنز دے کر دو وکٹیں حاصل کرنے کے بعد شاہین کی رینکنگ میں 4 درجے کی ترقی ہوئی ہے اور وہ بہترین باؤلرز کی فہرست میں 10 ویں نمبر پر آ گئے ہیں۔
اس رینکنگ میں جنوبی افریقہ کے تبریز شمسی پہلے نمبر پر ہیں جبکہ انگلینڈ کے عادل رشید دوسرے نمبر پر آ گئے ہیں اور جوش ہیزل ووڈ ایک درجہ تنزلی کے بعد تیسرے نمبر پر ہیں۔
ٹی ٹوئنٹی انٹرنیشنل: باؤلرز کی درجہ بندی
| شمار | باؤلرز | ملک | ریٹنگ |
|---|---|---|---|
| 1 | تبریز شمسی |  جنوبی افریقہ | 784 |
| 2 | عادل رشید |  انگلینڈ | 746 |
| 3 | جوش ہیزل ووڈ |  آسٹریلیا | 737 |
| 4 | ایڈم زیمپا | آسٹریلیا | 719 |
| 5 | راشد خان |  افغانستان | 714 |
| 6 | وانندو ہسارنگا |  سری لنکا | 687 |
| 7 | ایرنک نورتیے | جنوبی افریقہ | 655 |
| 8 | مجیب الرحمٰن | افغانستان | 654 |
| 9 | نسوم احمد |  بنگلہ دیش | 637 |
| 10 | شاہین آفریدی |  پاکستان | 634 |
واضح رہے کہ شاہین ٹیسٹ باؤلرز کی درجہ بندی میں چوتھے اور ون ڈے انٹرنیشنل میں ساتویں نمبر پر ہیں۔
اگر ٹی ٹوئنٹی بلے بازوں کو دیکھیں تو پاکستان کے بابر اعظم اب بھی نمبر وَن بیٹسمین ہیں۔ البتہ محمد رضوان اپنی دوسری پوزیشن سے محروم ہو کر تیسرے نمبر پر چلے گئے ہیں۔ ان کی جگہ جنوبی افریقہ کے آئیڈن مارکرم نے دوسرا مقام حاصل کیا ہے۔
ٹی ٹوئنٹی انٹرنیشنل: باؤلرز کی درجہ بندی
| شمار | بلے باز | ملک | ریٹنگ |
|---|---|---|---|
| 1 | بابر اعظم | پاکستان | 818 |
| 2 | آئیڈن مارکرم | جنوبی افریقہ | 796 |
| 3 | محمد رضوان | پاکستان | 794 |
| 4 | ڈیوڈ ملان | انگلینڈ | 728 |
| 5 | ڈیون کونوے |  نیوزی لینڈ | 703 |
| 6 | آرون فنچ | آسٹریلیا | 692 |
| 7 | رسی وان ڈیر ڈوسن | جنوبی افریقہ | 669 |
| 8 | مارٹن گپٹل | نیوزی لینڈ | 658 |
| 9 | پاتھم نسانکا | سری لنکا | 654 |
| 10 | لوکیش راہول |  بھارت | 646 |
