پاکستان سپر لیگ، یادیں پچھلے سال کی

یہ اسلام آباد یونائیٹڈ اور لاہور قلندرز کے درمیان کھیلا گیا ایک مقابلہ تھا جس میں اسلام آباد نے 145 رنز بنائے۔ جواب میں لاہور کا حال بہت برا تھا۔ صرف 69 رنز پر اس کے پانچ کھلاڑی آؤٹ ہو چکے تھے۔ یہاں پر عمراکمل کی 66 رنز کی اننگز نے لاہور کو امید کی کرن دکھائی۔ وکٹیں گرنا پھر بھی بند نہیں ہوئیں یہاں تک کہ جب آخری اوور شروع ہوا تو نواں کھلاڑی بھی آؤٹ ہو چکا تھا۔ لاہور کو جیتنے کے لیے چھ رنزکی ضرورت تھی، صرف ایک وکٹ باقی تھی اور گرانٹ ایلیٹ کھیل رہے تھے۔ انہوں نے محمد سمیع کی اگلی ہی گیند کو لانگ آن کے اوپر سے میدان سے باہر پہنچا دیا۔ہمیں ہیلمٹ کے پیچھے ایلیٹ کا سپاٹ چہرہ نظر آیا، انہوں نے اپنابلّا فضا میں بلند کیا اور اسے چھوڑ دیا۔بالکل اس طرح جیسےکسی مباحثے میں اپنی جیت کا یقین ہونے کے بعد تقریر کرنے والا مائیک پھینک دیتا ہے۔ اسی 'مائیک ڈراپ' کی طرز پر اسے 'بیٹ ڈراپ' کہا گیا۔ یہ ایسا منظر تھا جس نے ان ممالک میں بھی پی ایس ایل کی گونج پہنچائی جہاں پہلے لیگ کو اتنی اہمیت نہیں دی جاتی تھی۔ شکریہ! گرانٹ ایلیٹ کہ جن کے جشن نے ایک نئے انداز کو متعارف کروایا۔