زخمی احمد شہزاد کی وطن واپسی، ٹیسٹ سیریز سے باہر

پاکستان کے اوپنر احمد شہزاد سر پر لگنے والی چوٹ کے بعد صحت کی بحالی اور آرام کی خاطر فوری طور پر وطن واپس آ رہے ہیں، یوں ممکنہ طور پر ٹیسٹ سیریز سے باہر ہوگئے ہیں۔

نیوزی لینڈ کے خلاف ابوظہبی میں جاری ٹیسٹ کی پہلی اننگز میں 176 رنز بنانے کے بعد حریف باؤلر کوری اینڈرسن کی ایک اٹھتی ہوئی گیند ان کی دائیں کنپٹی پر لگی تھی۔ ضرب اتنی شدید تھی کہ ہیلمٹ پہننے کے باوجود احمد شہزاد فوری طور پر گر پڑے، بلّا وکٹوں پر جا لگنے سے وہ ہٹ وکٹ آؤٹ بھی ہوگئے، اور بعد ازاں انہیں شدید تکلیف کے عالم میں میدان سے باہر لایا گیا۔ ابتدائی سی ٹی اسکین کے مطابق کھوپڑی کی ایک نچلی ہڈی میں معمولی سا فریکچر ہے جس کی وجہ سے احمد شہزاد کو اگلے تین ہفتوں کے لیے کھیلنے سے روک دیا گیا ہے۔

ٹیم مینیجر معین خان کہتے ہیں کہ "کم از کم تین ہفتے کے لیے کھیل سے باہر ہونے کی وجہ سے احمد شہزاد اب ٹیسٹ نہیں کھیل سکتے اس لیے آرام اور بحالی کے لیے انہیں وطن واپس بھیجا جا رہا ہے۔" وطن واپسی پر پرواز کے دوران پاکستان کرکٹ بورڈ کے سینئر جنرل مینیجر اسپورٹس میڈیسن ڈاکٹر سہیل سلیم ان کے ہمراہ ہوں گے۔

احمد شہزاد کی عدم موجودگی میں محمد حفیظ کے ساتھ دوسری اننگز کا آغاز اظہر علی کررہے ہیں اور تیسرے روز کے اختتام پر پاکستان 319 رنز کی شاندار برتری کے ساتھ میچ میں بالادست مقام پر موجود ہے۔