[ریکارڈز] شاہد آفریدی کا منفرد اعزاز، ایک روزہ میں 300 چھکے

بلوم فاؤنٹین میں جنوبی افریقہ کے خلاف پہلا ایک روزہ پاکستان کے لیے مسرت کا کوئی پیغام تو نہ لا سکا لیکن اس مقابلے کے دوران پاکستان کے شاہد خان آفریدی نےایک تاریخی سنگ میل ضرور عبور کیا۔

پاکستانی اننگز کے دوران 35 ویں اوور کی دوسری گیند پر جب شاہد آفریدی نے روری کلین ویلٹ کو ڈیپ مڈوکٹ پر ایک خوبصورت چھکا رسید کیا تو وہ ان کے ایک روزہ کیریئر کا 300 واں چھکا تھا۔ یوں وہ ایک روزہ میں چھکوں کی ٹرپل سنچری بنانے والے دنیا کے پہلے بلے باز بن گئے۔ وہ طویل عرصے سے سب سے زیادہ چھکے لگانے کے ریکارڈ پر تو قابض تھے ہی لیکن اس سنگ میل کو عبور کرنے میں انہوں نے خاصا وقت لگا دیا۔ غالباً انہیں آخری 10 چھکے لگانے میں ڈیڑھ سال کا عرصہ لگا۔ بہرحال، شاہد کی 16 گیندوں پر 3 چھکوں سے مزین 34 رنز کی اننگز پاکستان کو فتح سے تو ہمکنار نہ کر سکی لیکن انہیں ایک انفرادی سنگ میل تک ضرور پہنچا گئی۔

شاہد آفریدی نے کیریئر کے 299 چھکے پاکستان کی نمائندگی کرتے ہوئے لگائے جبکہ ایک چھکا آئی سی سی ورلڈ الیون اور ایک ایشیا الیون کی جانب سے کھیلتے ہوئے لگایا۔

ذیل میں ایک روزہ کرکٹ میں سب سے زیادہ چھکے لگانے والے بلے بازوں کی فہرست ہے۔ آپ کے خیال میں شاہد آفریدی کے ریکارڈ کو توڑنے کی صلاحیت کس بلے باز میں ہے؟

ایک روزہ کرکٹ میں سب سے زیادہ چھکے لگانے والے بلے باز

نام	ملک	مقابلے	رنز	بہترین اسکور	سنچریاں	نصف سنچریاں	چوکے	چھکے
شاہد آفریدی		350	7109	124	6	33	650	301
سنتھ جے سوریا		445	13430	189	28	68	1500	270
سچن تنڈولکر		463	18426	200*	49	96	216	195
کرس گیل		242	8442	153*	20	45	974	193
سارو گانگلی		311	11363	183	22	72	1122	190
رکی پونٹنگ		375	13704	164	30	82	1231	162
کرس کیرنز		215	4950	115	4	26	345	153
مہندر سنگھ دھونی		219	7259	183*	8	48	556	152
ایڈم گلکرسٹ		287	9619	172	16	55	1162	149
برینڈن میک کولم		212	4875	166	4	25	438	145